മതം എന്റെ അഭിമാനം

 മതം എൻ്റെ അഭിമാനം

റെലീജ്യോ(Religio) എന്ന ലാറ്റിൻ പദത്തിൽനിന്ന് ഉൾതിരിഞ്ഞ Religion എന്ന പദമാണ് മതമെന്ന അർഥത്തിൽ വ്യാപകമായി ഉപയോഗിച്ചുവരുന്നത്. “മനുഷ്യനെ ഒന്നിപ്പിക്കുന്നത്’ എന്ന് ഭാഷാർഥം. ഒരു വിഭാഗം മനുഷ്യർ അനുഷ്ഠിക്കുന്ന വിശ്വാസ- ആചാരങ്ങളെ അവരുടെ മതം എന്ന് വിളിക്കുന്നു. പാശ്ചാത്യവും പൗരസ്ത്യവും ആധുനികവും പ്രാചീനവുമായ നിരവധി നിർവചനങ്ങൾ, വിവിധ പശ്ചാതലങ്ങളിൽ മതത്തിനു പ്രചാരത്തിലുണ്ട്. പ്രപഞ്ചത്തിന് സർവ ശക്തനും സർവജ്ഞനുമായ ഒരു സ്രഷ്ടാവുണ്ട്. അവനാണ് നമ്മെയും സർവ ചരാചരങ്ങളെയും പടച്ചത്. അന്നവും വെള്ളവും ജീവശ്വാസവും സംവിധാനിക്കുന്നത്. അവനെ വിശ്വസിച്ച്, കല്പനകൾ സ്വീകരിച്ച് ജീവിക്കുന്നതാണ് വിജയമാർഗം- മതം മുന്നോട്ടുവെക്കുന്ന അടിസ്ഥാന തത്വമിതാണ്. 

ചാൾസ് ബാബേജാണ് കമ്പ്യൂട്ടറിന്റെ പിതാവ്. ഡോ. റെന്ന ലെനക് സ്റ്റെതസ്കോപ്പ് കണ്ടുപിടിച്ചു. ഗ്രഹാംബെൽ ടെലിഫോണും മാർക്കോണി റേഡിയോയും നിർമിച്ചു. അങ്ങനെ വിവിധ കണ്ടെത്തലുകൾക്ക് പിന്നിലൊക്കെ ഒരാളുണ്ടാകും. അതാതു കണ്ടെത്തലുകൾ അവയുടെതായ ഉപജ്ഞാതാക്കളാണ് പഠിപ്പിച്ചുതരേണ്ടത്. അവരാണ് അവയുടെ ഉപയോഗരീതിയും ഫലവും വിശദീകരിക്കേണ്ടത്. ഉപജ്ഞാതാക്കളെ മാറ്റിനിറുത്തി ഉപകരണത്തെക്കുറിച്ച് ഒന്നുമറിയാത്തൊരാൾ അതിന്റെ പ്രവർത്തനങ്ങളും പാലിക്കേണ്ട നിയമങ്ങളും വിവരിക്കുന്നത് എത്രമേൽ അബദ്ധമാണ്! അതിലേറെ ബുദ്ധിശൂന്യമാണ് മനുഷ്യൻ പാലിക്കേണ്ട ജീവിതക്രമം അവന്റെ സ്രഷ്ടാവിൽനിന്നു സ്വീകരിക്കാതെ, മറ്റു സ്രോതസ്സുകളിൽ നിന്ന് സ്വീകരിക്കുന്നത്. സ്രഷ്ടാവാകുന്ന ദൈവത്തിന്റെ നിയമവ്യവസ്ഥകൾ പാലിക്കാതെ മനുഷ്യനെന്ന സങ്കീർണ യന്ത്രത്തെ പ്രവർത്തിപ്പിക്കുന്നവർ ഗുരുതരമായ പരാജയത്തിലാണ് എത്തിച്ചേരുക . മനുഷ്യനെന്നാൽ യഥാർത്ഥത്തിൽ ആത്മാവാണ്. അവനു സഞ്ചരിക്കാനുള്ള വാഹനമാണ്, ഉപകരണമാണ് ശരീരം. ഈ യന്ത്രത്തെ വേണ്ടവിധം പ്രവർത്തിപ്പിക്കാനുള്ള , ഓരോ ആത്മാവും ആത്മാർഥമായി സ്വീകരിച്ചനുഷ്ഠിക്കേണ്ട നിയമങ്ങളാണ് മതം.

ദൈവദത്തമായ മതവഴിയിലൂടെയല്ലാതെ ആത്മികവും അഭൗതികവുമായ പ്രശ്നങ്ങളെ പരിഹരിക്കാനാവില്ല. മനുഷ്യനെ തിന്മകളിൽ നിന്നെല്ലാം തടഞ്ഞു നന്മയിലേക്കു നയിക്കുന്നതാണ് മതം. മതം മനുഷ്യന് നല്‍കുന്ന എല്ലാ സന്ദേശങ്ങളും ജീവന്‍ തുടിക്കുന്നവയും പകരം വെക്കാനില്ലാത്തവയുമാണ്. വിലക്കപ്പെട്ട ഒരുപാട് കാര്യങ്ങളുണ്ട്. മദ്യപിക്കാന്‍ പാടില്ല. പലിശയില്‍ അധിഷ്ഠിതമായ വിനിമയങ്ങള്‍ പാടില്ല. ഇതിന്റെ ഗുണങ്ങള്‍ കേവലം മതവിശ്വാസിക്ക് മാത്രമല്ല. ഒരു മനുഷ്യന്‍ മദ്യപിക്കാതിരിക്കുകയാണെങ്കില്‍ അതുകൊണ്ടുള്ള ആരോഗ്യപരമായ പ്രയോജനം അയാള്‍ക്കുണ്ടാകുന്നു. പലിശരഹിതമായ വിനിമയങ്ങളില്‍ ഏര്‍പ്പെടുകയാണെങ്കില്‍ അതിന്റെ പുണ്യവും നേട്ടവും അയാള്‍ക്കുണ്ടാകുന്നു. അയാള്‍ വിശ്വാസിയാണെങ്കിലും അല്ലെങ്കിലും.

സത്യം പറയുക, സ്‌നേഹം കൈമാറുക, ബഹുമാനിക്കുക തുടങ്ങി മാനുഷിക ഗുണങ്ങളായി മതം പഠിപ്പിക്കുന്ന നൂറു കണക്കിന് കാര്യങ്ങളുണ്ട്. ഇവ ആരാണോ ആചരിക്കുന്നത്, അവര്‍ക്കെല്ലാം അതിന്റെ ഗുണം ഈ ലോകത്തു വെച്ചു തന്നെ ലഭിക്കും. മതം അതിന്റെ ആചാര അനുഷ്ഠാനങ്ങളിലൂടെയും വിധിവിലക്കുകളിലൂടെയും നല്‍കുന്ന ഈ നവജീവന്‍ നമുക്ക് ജീവിതം സുരക്ഷിതമാക്കാനും പ്രയാസങ്ങളില്ലാതെ ജീവിക്കാനും വേണ്ടിയാണ്.

ഇന്ന് യുക്തിവാദികൾ പറയുന്നത് മതമാണ് എല്ലാ തിന്മകൾക്കും കാരണമെന്നാണ്. മതം വേണ്ട മനുഷ്യനായാൽ മതി എന്നാണ്. ഒരു മനുഷ്യനെ സംബന്ധിച്ചിടത്തോളം എന്താണ് നന്മ എന്താണ് തിന്മ എന്ന് തിരിച്ചറിയാനുള്ള കഴിവ് മനുഷ്യനില്ല. ഒരാൾക്ക് ശരി എന്ന് തോന്നിയ കാര്യം വേറെ ഒരാൾക്ക് തിന്മയായിട്ട് തോന്നും. അവിടെ മനുഷ്യനെ സൃഷ്ടിച്ച സ്രഷ്ടാവു പറഞ്ഞു തരണം എന്താണ് നന്മ എന്താണ് തിന്മ എന്ന്. മനുഷ്യന്റെ ബുദ്ധികൊണ്ട് നന്മ തിന്മകൾ മനസ്സിലാക്കാൻ സാധിക്കില്ല. മതത്തിന്റെ നിയമങ്ങൾ പാലിക്കാൻ സാധിക്കാതെ വരുമ്പോൾ കുത്തഴിഞ്ഞ ജീവിതത്തിൽ മതം ഒരു തടസ്സം ആവുമ്പോൾ അവിടെ നിരീശ്വരവാദം ഉണ്ടാവുന്നു എന്നതാണ് സത്യം.

മതം വർജ്യമാണെന്നതിൻ്റെ നിരർത്ഥകതയിലേക്കൊന്ന് നോക്കൂ...

അണുബോംബ് നിർമിക്കാനുള്ള വിജ്ഞാനം ശാസ്ത്രം പഠിപ്പിക്കും; എന്നാൽ അത് മനുഷ്യർക്കു മേൽ പ്രയോഗിക്കരുതെന്ന് പറയാൻ മതം വേണം. ക്ലോറോഫോം (Chloroform)എന്ന രാസപദാർഥം ഉപയോഗപ്പെടുത്തി മനുഷ്യരെ കൊല്ലേണ്ടതെങ്ങനെയെന്ന പഠനം ശാസ്ത്രത്തിന്റെ മേഖലയാണ്; എന്നാൽ അപ്രകാരം ചെയ്യുന്നതിന്റെ നൈതികതയെക്കുറിച്ചുള്ള ചർച്ച അവിടെ പ്രസക്തമല്ല. അതിനും മതം വേണം. ആരോരും കാണാത്തിടത്തുവെച്ച് നിരോധിത മയക്കുമരുന്ന് ഉപയോഗിക്കുന്നതിൽ നിന്ന് നിയമലംഘകരെ തടയാൻ ഈ സംവിധാനങ്ങൾക്കാകില്ല. കൈകൂലി വാങ്ങുന്ന ഉദ്യോഗസ്ഥരെ സാഹസികമായി പിടികൂടേണ്ടിവരുന്നത് ഇത്തരമൊരു പരിമിതികൊണ്ടാണ്. “നയനങ്ങളുടെ സ്വകാര്യ ദർശനം മുതൽ ഹൃദയാന്തരങ്ങളുടെ രഹസ്യവിചാരം വരെ അറിയുന്ന (അൽ ഗാഫിർ 19), എപ്പോഴും വീക്ഷിച്ചു കൊണ്ടിരിക്കുന്ന (സൂറത്തുൽ ഫജ്ർ :14) അല്ലാഹുവിലുള്ള യഥാർത്ഥ വിശ്വാസം മാത്രമേ എല്ലായ്പോഴും മനുഷ്യനെ നിയന്ത്രിക്കുകയുള്ളൂ. മനുഷ്യ വിജയത്തിനുള്ള പ്രായോഗിക മാർഗം ഭൗതിക നിയമങ്ങളൊന്നുമല്ല; ദൈവിക മതമാണെന്ന് ചുരുക്കം. ഇവിടെയാണ് നമ്മുടെ മതം നമുക്ക് അഭിമാനമാകുന്നത്.

വിശ്വാസവും സല്‍പ്രവര്‍ത്തനവുമായി ഒരാള്‍ ജീവിക്കുകയാണെങ്കില്‍, ധര്‍മവും നീതിയും നിത്യശീലങ്ങളാക്കി അവന്‍ ജീവിതം മുന്നോട്ടു കൊണ്ടുപോകുകയാണെങ്കില്‍ അത്തരക്കാര്‍ക്ക് സന്തുഷ്ടകരമായ ജീവിതം അല്ലാഹു നല്‍കും എന്ന ഖുര്‍ആന്‍ വാക്യം (അന്നഹ്ൽ 97) നിങ്ങളെ ഉണർത്തി ഞാനെൻ്റെ പ്രസംഗം നിർത്തുന്നു.