നമ്മുടെ മാതാപിതാക്കൾ

السلام عليكم ورحمة الله ഇന്ന് ഞാനിവിടെ വളരെ പ്രധാനപ്പെട്ട ഒരു കാര്യത്തെക്കുറിച്ച് സംസാരിക്കാനാണ് ആഗ്രഹിക്കുന്നത് – നമ്മുടെ മാതാപിതാക്കളെ ആദരിക്കുകയും അവരെ അനുസരിക്കുകയും ചെയ്യൽ എന്നതാണ് എൻ്റെ വിഷയം. നമ്മുടെ മാതാപിതാക്കളാണ് മറ്റാരെക്കാളും നമ്മെ അത്യധികം സ്നേഹിക്കുന്നത്. അവർ നമ്മെ പരിപാലിക്കുന്നു, പഠിക്കാൻ സഹായിക്കുന്നു, നിഖില മേഖലകളിലും നമുക്ക് ഏറ്റവും നല്ലത് ലഭിക്കണമെന്നാണ് മാതാപിതാക്കൾ കാംക്ഷിക്കുന്നത്. നാം നമ്മുടെ മാതാപിതാക്കളുടെ ഉപദേശ നിർദേശങ്ങൾ കേട്ടനുസരിക്കുമ്പോഴാണ് അവരോടുള്ള ബഹുമാനവും നന്ദിബോധവും നമുക്ക് പ്രകടമാക്കാൻ സാധിക്കുക. അവർക്കു നമ്മളെക്കാൾ പരിചയസമ്പത്തും കാര്യങ്ങളെ കുറിച്ചുള്ള അവബോധവുമുണ്ട് . അതുകൊണ്ടു തന്നെ, പ്രഥമദൃഷ്ട്യാ നമുക്ക് ശരികേടാണെന്ന് തോന്നുന്ന കാര്യങ്ങളിലും മാതാപിതാക്കളുടെ ദീർഘവീക്ഷണം കണക്കിലെടുത്ത് അവരെ അനുസരിക്കണം. അവർ ഒരിക്കലും തന്നെ നമുക്ക് ദോഷമുള്ളത് ആഗ്രഹിക്കുകയില്ലല്ലോ. .... മാതാപിതാക്കളെ അനുസരിക്കുക എന്നു പറഞ്ഞാൽ നമ്മുടെ കടമകൾ നിറവേറ്റുകയും, അവർ ആഗ്രഹിക്കുന്ന തരത്തിൽ പഠന കാര്യങ്ങളിൽ അതീവ ശ്രദ്ധ പുലർത്തുകയും അവരോട് സൗമ്യമായി പെരുമാറുകയും ചെയ്യുക എന്നുള്ളതുമാണ്. മാത്രമല്ല , അവരോട് സത്യസന്ധതയോടെ നമ്മുടെ അനുഭവങ്ങൾ തുറന്നു പറയലും ഇതിൻ്റെ ഭാഗമാണ്. ഇങ്ങനെ ശീലിച്ചാൽ നമ്മുടെ വീടകം സുന്ദരമാകും. നമുക്കാവശ്യമുള്ളതെല്ലാം വേണ്ട രൂപത്തിൽ നമുക്ക് ലഭിക്കുന്നുണ്ടെന്ന് ഉറപ്പുവരുത്താൻ അവർ നന്നായി കഷ്ടപ്പെടുന്നുണ്ടെന്ന് കുട്ടികളായ നാം മറന്നുപോകരുത്. അവരോടുള്ള അതിരറ്റ സ്നേഹവും ആദരവും നാം തിരിച്ചു കൊടുക്കേണ്ടത് അവർ പറയുന്ന കാര്യങ്ങൾ ഒരു മടിയും കൂടാതെ അനുസരിച്ചുക്കൊണ്ടാണ്. അതുകൊണ്ട് , മാതാപിതാക്കളുടെ മാർഗനിർദേശങ്ങൾ പിന്തുടരാനും അവരെ അക്ഷരംപ്രതി അനുസരിക്കാനും നമുക്കേവർക്കും നന്നായി ശ്രമിക്കാം. ഇതു സംരക്ഷണബോധവും ഉത്തരവാദിത്വബോധവുമുള്ള വ്യക്തികളായിത്തീരാൻ നമ്മെ സഹായിക്കും. ഇത്രയും പറഞ്ഞു കൊണ്ട് ഞാൻ എൻ്റെ ചെറിയ പ്രസംഗം നിർത്തുന്നു.